Goeie more op nog 'n lieflike dag!!
Terwyl ek hierdie vir jou skryf, ritsel die wind saggies deur die groot pekanneutboom se blare hier by ons kamervenster. En dit laat my altyd dink aan 1Konings 19:12 "... En na die vuur was daar 'n fluistering in die windstilte." 'n Gedeelte wat ons 'n paar jare terug by The Reeds gemeente se Retreat, op 'n baie spesiale plek in die natuur, behandel het. Dis die begin van daardie jaar wat my lewenspaadjie 'n ander draai begin maak het en die retreat was die eerste stap in die voorbereiding. En weet jy wat? Terwyl ek nou met die Bybel oop op my skoot sit by daardie gedeelte, kry ek die reuk van die plek waar ek in die veld gesit het. Want 'n blaar en 'n kosmosblommetjie wat ek daar gepluk het by die plekkie waar ek my stilword gehou het, is steeds op hierdie plek in my Bybel. Wow!!! besef ek nou net ...'n kosmosblommetjie.
